Nénten gampang nangiang kesenian sané sampun punah, merluang sifat optimis mangda nénten ojah. Sakadi nangiang indik tanjekan taksu Sanghyang Pitik lan Sanghyang Séngkong ring Pura Sanghyang Pitik.
Kelian Adat Banjar Pitik, Kelurahan Pedungan, Kecamatan Dénpasar Selatan, I Wayan Manggis nedeng pageha nangiang kesenian sané wénten ring Banjar Pitik. "Nénten ja gampang nanging titiang tetep mautsaha," Manggis kukuh. Kakukuhan punika sané ngawinang Manggis nekain umah-umah panglisir sané wénten ring Banjar Pitik. Silih tunggilnyané Dadong Nyamplug sané biasané ketah kasambat Dadong Kon sané yusanné ulung sad atian (80-an). Saking Dadong Nyamplug puniki, Manggis polih akidik informasi indik Tari Sanghyang Pitik. Manut Nyamplug kawéntenan Sanghyang Pitik puniki Nyamplug polihin saking Pekak Bokor. Daweg punika Nyamplug kari alit. Informasi saking Nyamplug, Pekak Bokor punika pamangku Pura Sanghyang Pitik, Nyamplug utawi Dong Kon uning yéning pragina Tari Sanghyang Pitik biasané masolah sambilanga karauhan. "Sané nyolahang wantah anak istri alit sané durung kotor kain (Dong Kon nujuhang anak istri alit sané yusané sawatara nem ngantos kutus tiban). Nanging daweg tiang kantun alit, tiang sampun nénten nyingakin sesolahan puniki," Dong Kon maangen-angen. Manut Manggis, yéning nyingakin yusané Dong Kon, Tari Sanghyang Pitik punika wénten sawatara ring warsa 1920-an, salanturnyané punah ngantos mangkin.
Tiosan ring punika Tariang Sanghyang Séngkrong kapolihin Manggis saking Ni Pica sané ketah kasambat Dong Toprak. Manut Dong Toprak sané yusanné alitan ring Dong Kon, ngangken riwusan jaman Jepang warsa 1950-an naenin wénten Tari Sanghyang Séngkrong. "Praginané anak truna. Panganggénné sakadi baris lan nganggén gelungan. Yéning masolah pastika karauhan," Dong Toprak nyerita. Crita sané pateh taler kacritayang olih I Wayan Suwéca (63 tahun). Daweg kari alit, Suwéca ngangken naenin nonton sesolahan Tari Sanghyang Séngkrong ring jaban Pura Sanghyang Pitik. “Daweg punika, praginané anak truna sané panganggéné sakadi baris, ring sirah nganggén gelungan. Kéwala ri kala ngigel pananggéné kari biasa, nganggén celana péndék. Praginané mangigel ngiterin kalangan di jaba pura lan ri kala ngigel madingehang suara krincing-krincing saking gelang cokorné,” Suwéca maangen-angen. Saingat Suwéca nika pinaka peméntasan paling ungkur. Kala punika yusanné sawatara dasa tiban. Mangda informasi sané kapolihin prasida jangkep, Manggis raris nekain Madé Ratog sané mayusa pitung dasa pat tiban. Saking Ratog kapolihin informasi, pragina Tari Sanghyang Séngkrong nganggén hisan ring sirah sakadi kasa magulung, sakadi kobér ri kala macaru. Punika pinaka cihna yéning Tari Sanghyang Séngkrong punika tarian sakral sané dados kapéntasang ring pura kémanten.
Taler manut Ratog, tiosan ring tarian punika, taler naenin wénten seni Barong Puoh. “Nanging sira ja sané nyalukin ngemasin mati. Kasuén-suén Barong Puoh kakutang lan nénten katangiang ngantos mangkin,” tutur Ratog. Tiosan ring tarian punika manut Manggis taler naenin wénten tarian Barong Bangkung, sawusan icalnnyané kesenian Barong Puoh. “Ri kala punika sangkaning wénten sesaud munyi di carik, wénten taler kesenian sané metu spontan inggih punika kesenian Cupa, Gandrung, lan Arja,” crita Suwéca. Crita-crita kesenian di Banjar Pitik kapuputang olih metunyané jogéd. “Nanging jogéd sané wénten ring Pura Sanghyang Pitik ri kala kapéntasang pragina jogédé sering karauhan. Makéh praginané sawatara pat ngantos lima, samian karauhan, rumasuk titian,” baos Kipug utawi Mén Séndra (70-an tahun), silih tunggil pragina jogéd sané kari nyeneng. Manut mantan kelian Banjar Pitik, Madé Reja (80-an tahun), ”daweg punika Hyang Widhi karasayang nampek pisan.” Manut Manggis, seni tari-tari sané naenin wénten ring Banjar Pitik, punika mawit saking taksu Pura Sanghyang Pitik. “Sangkaning samian mawit lan polih restu saking Betara sané malingga ring Pura Sanghyang Pitik. Nanging mangkin seni-seni punika sampun punah, punika sané ngeranayang kautsahayang kaselehin lan kadokuméntasiang, mangda pianak lan cucuné nénten pelih,” baos Manggis. (iwa)
sumber: http://www.balipost.co.id/mediadetail.php?module=detailberitaminggu&kid=19&id=36116
Langganan:
Posting Komentar (Atom)
Tidak ada komentar:
Posting Komentar